Почетна / Активен живот / ЗНАЧЕЊЕТО НА ОМЕГА МАСНИТЕ КИСЕЛИНИ ВО ИСХРАНАТА

ЗНАЧЕЊЕТО НА ОМЕГА МАСНИТЕ КИСЕЛИНИ ВО ИСХРАНАТА

Храната не е само задоволство во животот, таа е исто така  важен фактор за нашето здравје. Човековата исхрана претставува мешавина од хранливи материи, кои се единствен извор на енергија потребна за опстојување. Енергетски сиромашната исхрана загрозува многу животни функции, а пред се работната способност. Храната е незаменлив услов за оптимален развој, здравје, добро расположение, значи дел од животот на човекот. Во светот значењето на исхраната е многу сериозно, па од таму и барањата за рационална, здрава и безбедна исхрана се се поголеми.

Човековата исхрана содржи заситени, моно незаситени и повеќепати незаситени масни киселини. Линолната, линоленската и арахидонска масна киселина, како претставници на повеќепати незаситени масни киселини, се есенцијални материи и организамот не може да ги синтетизира, поради што е потребно постојано да се внесуваат.

Во мастите на луѓето и животните преовладуваат омега-6 масни киселини, а во рибиното масло омега-3 масни киселини. Некои растенија особено, зелените, содржат и омега-3 и омега-6 масни киселини. Често пати во диететската исхрана се препорачува два пати во текот на неделата да се внесуваат риби или производи од риби, бидејки во рибиното мало има многу омега-3. Треба да се напомене дека постои голема разлика меѓу слатководните и морските риби. Слатководните риби, кои се користат кај нас заради начинот на нивната исхрана (вештачки се хранат во рибници), содржат мононезаситена палмитолеинска киселина,  додека морските риби  се богати  со повеќепати назаситени масни киселини.

2014-07-09-the-ideal-ratio-of-omega-6-to-omega-3-fatty-acids-for-reducing-inflammation-ratio (1)
Зошто е потребно да се внесуваат омега масните киселини?

Тие штитат од развивање на коронарни срцеви заболувања, бидејки содржат незаситени масни киселини. Тоа е важно особено кога постојат ризични фактори како што се: староста, покачен крвен притисок, холестеролемија.

Во неколку научни истражувања споредени се Ескими и Данци и зачестеноста на појава на артериосклероза и заболувања на срцевите садови. Ескимите, кои претежно се хранат со разни видови морски животни и покрај многу суровите услови за живеење во споредба со Данците имаат помалку болни од артериосклероза и срцеви заболувања.

Омега масните киселини се наоѓаат и во некои зелени растенија и семиња и тоа омега-3 во семе од лен, репка и конола, омега-6 може да се добие од јаглика и црна рибизла, во помали количини од масло од пченка, соја, сончоглед и шафраника, омега -9 од маслиново масло, кикирики и авокадо.

Научно е докажано дека омега масните киселини ја смалуваат содржината на арахноидонската киселина во мембраните на тромбоцитите и леукоцитите, а го зголемуваат еукозапентуатот, кој го кочи  натрупувањето  на тромбоцитите во крвните садови.

omega3

Омега масните киселини влијаат на контракцијата на срцевиот мускул, тие ја смалуваат силата на срцевата контракција (инотропниот одговор)  на т.н. алфа-адренергични стимулации, а со тоа го смалуваат оштетувањето на исхемичното срце.

Омега-3 покрај ова допринесува и за одржување на нормалното ниво на триглицеридите и холестеролот во крвта.

Омега-6 како поспецифично дејство има силно влијание на имуната функција така што ослободува лимфокинини кои ги активираат клетките на имуниот систем за одбрана на организамот. Омега-6 есенцијалната масна киселина учествува во создавањето и излачувањето на некои хормони од хипофизата, тироидеата и од адреналните жлезди и така директно или индиректно учествува во градењето на имуниот систем во организамот. Освен тоа учествува во создавањето и прифаќањето на некои неуротрансмитери кои учествуваат во одржувањето на расположението и сонот.

Омега-9 е олеинска масна киселина која не спаѓа во есенцијалните масни киселини, но преставува добар партнер на предходните две омега масни киселини. Според научните сознанија учествува во намалување на артериосклеротичните промени, го подобрува имуниот систем и има заштитна улога во спречување на развивање на некои канцерогени заболувања.

Најновите испитувања покажуваат дека омега масните киселини имаат најдобар ефект кога се земаат во комбинација 3-6-9, отколку кога се земаат поединечно. Омега масните киселини треба да се внесуваат костантно, бидејки, како што веќе рековме, организамот не може да ги синтетизира.

Уште нешто што е исто така многу важно: омега масните киселини осигуруваат создавање на простагландини. Простагландините се соединенија слични на хормоните кои имаат функција во регулирање на болката и отоците, помагаат во одржувањето на нормалниот крвен притисок, на нивото на холестеролот и учествуваат во преносот на нервните импулси.

Фактори кои ја намалуваат ресорбцијата на омега масните киселини се:  возраста, лошо балансираната исхрана, храна богата со транс масни киселини (брзи и пржени храни во прегорени масла), консумирање на алкохол, недоволен внес на некои витамини и минерали и одредени лекови.

Знаци за недостаток на омега масни киселини се: брзо заморување, сува кожа, опаѓање на косата, репродуктивни проблеми, слаба меморија, чести имунолошки нарушувања, слаба периферна циркулација, менување на расположението и депресија.

Кај бремените жени се препорачува консумирање на соодветна храна (риба) или земање на суплементација на готови препарати од омега масните киселини, бидејки тие допринесуваат за нормалниот развиток на мозокот, нервниот систем и видот кај плодот. Невнесувањето на доволни количини на овие киселини, според научните сознанија, може да предизвика скратено време на бременост и предвремени раѓања. Од таму во текот на бременоста, а особено во текот на доењето, треба да се внeсуваат омега масни киселини. Внесувањето омега масни киселини допринесува за правилен раст и развиток на децата, особено во зимскиот период, како и заштита од настинки и други болести како на пр. рахитисот (заради недоволна количина на витаминот Д).

Проверете и

CoQ10 – ПОДДРШКА ЗА ЗДРАВ СРЦЕВ МУСКУЛ И ПОВЕЌЕ ЕНЕРГИЈА ЗА ОРГАНИЗМОТ

Што е CoQ10? Коензимот Q10 е природен нутриент есенцијален за живот и здравје на секоја ...